Одил Ёқубовга энг катта шуҳрат келтирган асарларидан бири- «Кўҳна дунё» тарихий романи ҳисобланади. Адабий танқидчиликнинг баҳосига кўра, Одил Ёқубовнинг «Кўҳна дунё» романининг марказида Ибн Сино ҳамда Беруний тақдирлари, улар яшаган давр туради. Муаллифнинг хулосалари ва умумлашмалари кенг, шунинг учун тарихий ҳақиқатга ажиб долзарб маъно бағишлайди. Замонлар оша қилинган саёҳат теран фалсафий умумлашмалар чиқаришга имкон беради. Романда тасвирланган барча воқеалар ҳужжатлар билан чеклаб қўйилмаган. Одил Ёқубов тарихни худди кўриб туради, тарих билан баҳслашади, замондошларга узоқ ўтмишдошларининг тажрибаларидан гувоҳлик бераётгандай бўлади. У тарихга бугунги давр нуқтайи назаридан қарайди.