Қўлингиздаги ушбу мўъжаз китоб "Ҳақиқий омад калити ёхуд Савдогарлар устози" номи билан инсонларнинг қалбидан жой олган ва "Давоми борми?", деган юзларча сўровларнинг жавоби ўлароқ “Ҳақиқий омад калити ёхуд Савдогарлар устози 2" бўлиб сизларга тақдим этилмоқда. Иккинчи қисмида мусулмонларнинг бой бўлишидаги ҳикматлар, бойликнинг нафи, ундан кўзланган мақсадлар, қўлдаги мулкка эмас, Аллоҳ Таолонинг даргоҳидаги хазиналарга кўпроқ ишонишнинг буюк ютуқлиги, жўмардликнинг беназир намуналари, жасурликнинг "қўрқоқлик умрини узайтирмайди, ботирлик умрни қисқартирмайди" қабилидаги гўзал англамлари, устозга, ота-онага хизматнинг ҳақиқий юксалиш экани, тил ўрганишнинг инжа сирлари, бола тарбиясининг нозик жиҳатлари, шерикчиликнинг нодир намуналари, тижоратчи бўлишнинг ғайратни жўштирар томонлари, сафар, саёҳат қилишнинг минг бир фойдалари, соғлом ҳаётнинг ҳалигача ўзгармаган олтин қоидалари,сармоядор бўлишнинг нозик томонлари ва бошқа ажиб бир илмларнинг киссаларда жо бўлган дилга яқин жамланмаларини кўрасиз. Абдуллоҳ ибн Муборак ҳазратлари Мадрасада мударрис, устоз, гўзал нотиқ, шаҳарларда тожир, жангларда буюк бир қаҳрамон эди. Қалам ва қилич соҳиби эди. Қалами билан ўзидан кейин келадиганларнинг ҳаётини енгиллаштирадиган асарлар ёзди, қиличи билан тилларда достон бўлгулик мардлик ва жасоратнинг беқиёс намуналарини кўрсатди.