Malkolm Gladuell: Zukkolar va landovurlar

Bu foniy dunyo hayotini adolatli deb bo‘lmaydi. Pul, hokimiyat, shon-shuhrat va omad odamlarning barchasiga teng taqsimlangan emas. Nega ayrim odamlarning hamma narsasi bor, boshqa odamlarda hech vaqo yo‘q? Omadning sabablarini faqat insonning tabiat inʼom etgan shaxsiy fazilatlari bilan bog‘lash to‘g‘rimikin?

Malkolm Gladuell har doim mutloqo tasodif hisoblab kelingan muvaffaqiyatlarning zamirida yotgan yashirin qonuniyatlarni topgan birinchi insondir. Bu qonuniyatlar nega buyuk xokkeychilar, qoida tariqasida, yanvarda tug‘ilgan bo‘lishini va hech qachon oktyabrda tug‘ilmasligini; nima uchun matematikani osiyolik talabalar boshqalardan ko‘ra oson o‘zlashtirishini; nega Nyu-Yorkning eng obro‘li advokati bo‘lish uchun albatta yahudiy bo‘lish lozimligini tushuntirib beradi. Bu kitob Bill Geyts, “Bitlz” va Motsartni nima bog‘lab turishini hamda ular nega tengdoshlaridan o‘zib ketganligini ko‘rsatadi.

«Zukkolar va landovurlar» — «qanday qilib muvaffaqiyatli inson bo‘lish» bo‘yicha qo‘llanma emas. Bu siz o‘zingizga foydali tarzda foydalanishingiz mumkin bo‘lgan hayot qonuniyatlari olamiga zavqli bir sayohatdir.